Start

 
‘’t Mestreechter Gelegenheidskoer (MGK) is in 1992 opgeriech es ‘Hierekoer Treech’. Dat waor bij ’t 50-jaoreg zjubilei vaan de watersportclub Treech ’42.
De bedoeling waor um de lede te verrasse door de viering in de kèrk vaan Sint Pieter bove op te luustere mèt ’n Mestreechter Mès. In de boezem vaan de watersportclub wis me get manslui veur e koer te motivere. Manne die bedreve waore op ’t water, op de jeu-de-boulesbaon of in de kantien en boevaan de mieste boete de vastelaovend noets hel-op hadde gezoonge. Nao e paar maond vaan rippetere en väöl lache woort in juni de Mès gezoonge. Wie achteraof bleek, waor dit ein vaan de hoegtepunte vaan ’t zjubilei.
Eve later woorte de manne gevraog in de Sintervaoskèrk te zinge. Dat is zoe good oontvaange tot ’t koer dèkser gevraog woort bij broelofte, begraffenisse, zjubileis en aander fieste.
Noe 26 jaor wijer is ’t rippertoire flink oetgebreid mèt sjoen en gezèllege Mestreechse leedsjes, variërend vaan smartlap tot wals en vaan tango tot marsj. En roond december bringk ’t koer stummege Mestreeechter keersmeziek. Zinge is leuk, gezoond en ontspannend. Good tege de stress en veur ’n beter aosemholing. ’t Instrumint (de eige stum) heet eder al bij ziech en hoof allein get wijer ontwikkeld te weure. Euzen dirizjent liet us zoe same zinge tot aandere gere nao us luustere. Intresse? Oonder ’t motto ‘zingende lui zien blij lui’ steit de deur vaan Traject aon de Gentiaanstraot 1 op Mariaberg ope. Edere zoondagmörge rippetere veer vaan 10.00 tot 12.00 oor. Welliech veur uuch de gelegeheid ’ns kinnes te make mèt ’t MGK, ouch al höb geer noets gezoonge in koerverband en kint geer gein noet leze zoe groet wie ’n hoes.
Info? Bel euze veuzitter Harrie Hul 043 343.32.61.